Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

Bakı Dövlət Rabitə və Nəqliyyat Kollecində müəllimlərin əməyi yüksək qiymətləndirildi

Bakı Dövlət Rabitə və Nəqliyyat Kollecində müəllimlərin əməyi yüksək qiymətləndirildi

Bakı Dövlət Rabitə və Nəqliyyat Kollecində müəllim əməyinə verilən yüksək dəyərin daha bir nümunəsi olaraq təltifetmə mərasimi keçirilib. Tədbir kollecin direktoru Səbuhi Qurbanov və Kollecin Həmkarlar İttifaqı Komitəsinin sədri Aygün Musayevanın birgə təşkilatçılığı ilə həyata keçirilib.

Tədbir çərçivəsində 65 illik yubileyini qeyd edən, uzunillik səmərəli pedaqoji fəaliyyəti ilə seçilən, eləcə də kollecin ictimai həyatında fəal iştirak edən müəllimlər təltif olunublar.

Çıxış zamanı müəllimlərin gənc nəslin təlim-tərbiyəsində göstərdikləri fədakar xidmətlər, təhsil sahəsində qazandıqları nailiyyətlər və kollecin inkişafına verdikləri töhfələr xüsusi vurğulanıb. Direktor Səbuhi Qurbanov müəllimləri təbrik edərək onlara möhkəm cansağlığı, uzun ömür, yeni uğurlar və gələcək fəaliyyətlərində nailiyyətlər arzulayıb.

Bakı Dövlət Rabitə və Nəqliyyat Kolleci müəllim əməyinin dəyərləndirilməsini, onların sosial rifahının və peşəkar fəaliyyətinin dəstəklənməsini daim diqqət mərkəzində saxlayır və bu kimi tədbirlərlə müəllimlərə göstərilən ehtiramı davam etdirir.

Hörmətli Araz Paşayev! Doğum gününüz münasibətilə Sizi Bakı Dövlət Rabitə və Nəqliyyat Kollecinin rəhbərliyi, Həmkarlar İttifaqı Komitəsi və kollektivi adından ürəkdən təbrik edirik!

Hörmətli Araz Paşayev!

Doğum gününüz münasibətilə Sizi Bakı Dövlət Rabitə və Nəqliyyat Kollecinin rəhbərliyi, Həmkarlar İttifaqı Komitəsi və kollektivi adından ürəkdən təbrik edirik!

Sizə möhkəm cansağlığı, uzun ömür, tükənməz enerji və fəaliyyətinizdə yeni-yeni uğurlar arzulayırıq. Təhsil sahəsinin inkişafı naminə həyata keçirdiyiniz dəyərli işlərin daim uğurla davam etməsini, şəxsi həyatınızda sevinc, xoşbəxtlik və firavanlıq diləyirik.

Doğum gününüz mübarək, yeni yaşınız Sizə xoş xatirələr, uğurlar və gözəl nailiyyətlər gətirsin!

28 May – Müstəqillik Günü münasibətilə Bakı Dövlət Rabitə və Nəqliyyat Kollecində tədbir keçirilib.

28 May – Müstəqillik Günü münasibətilə Bakı Dövlət Rabitə və Nəqliyyat Kollecində tədbir keçirilib. 

Tədbir direktorumuz Səbuhi müəllimin təşkilatçılığı ilə keçirilib. Tədbirdə təlim-tərbiyə işləri üzrə direktor müavini Şahmurad müəllim və tarix müəllimi Səidə müəllim çıxış edərək Müstəqillik Gününün tarixi əhəmiyyəti, xalqımızın müstəqillik uğrunda mübarizəsi və bu günün gələcək nəsillər üçün önəmi barədə məlumat veriblər. 

Tədbirdə iştirak edənlər həm dövlətçilik, həm də milli-mənəvi dəyərlərin önəmi barədə geniş məlumat əldə ediblər.

Kollecimizdə Azərbaycan tibb elminin parlaq siması, akademik Zərifə xanım Əliyevanın anadan olmasının 103-cü ildönümü münasibətilə xatirə tədbiri təşkil olundu.

Kollecimizdə Azərbaycan tibb elminin parlaq siması, akademik Zərifə xanım Əliyevanın anadan olmasının 103-cü ildönümü münasibətilə xatirə tədbiri təşkil olundu.

Tədbirdə kollecin direktoru Səbuhi müəllim, təlim-tərbiyə işləri üzrə direktor müavini Şahmurad müəllim və tarix müəllimi Səidə xanım çıxış edərək Zərifə xanımın şərəfli ömür yolundan, onun Azərbaycan tibb elminin inkişafındakı əvəzsiz xidmətlərindən bəhs etdilər.

Şabranın qədim tarixinə baxış: Erkən Tunc dövrü 🏺

Şabranın qədim tarixinə baxış: Erkən Tunc dövrü 🏺

Bu gün tariximizi daha dərindən öyrənmək və gənc nəsli məlumatlandırmaq məqsədilə növbəti maraqlı tədbirimiz baş tutdu. Səidə Quliyevanın moderatorluğu ilə keçirilən görüşdə Şabran Tarix-Diyarşünaslıq Muzeyinin direktoru Bəsti Məmmədova qonağımız oldu.

✅ Tədbirin əsas mövzusu: “Şabran erkən tunc dövrü”

✅ Məqsəd: Tələbələrin regionun arxeoloji irsi və qədim mədəniyyəti haqqında biliklərini artırmaq.

Bəsti xanım öz geniş təcrübəsi ilə Şabranın o dövrə aid nadir tapıntıları və tarixi əhəmiyyəti barədə tələbələri ətraflı məlumatlandırdı. Tariximizi tanımaq və tanıtmaq hər birimizin borcudur!

#Şabran #Tarix #Arxeologiya #TuncDövrü #Tələbə

Bakı Dövlət Rabitə və Nəqliyyat Kollecində 8 Mart – Beynəlxalq Qadınlar Günü qeyd olundu

Bakı Dövlət Rabitə və Nəqliyyat Kollecində 8 Mart – Beynəlxalq Qadınlar Günü münasibətilə tədbir keçirilmişdir. Tədbirdə kollecin rəhbərliyi, müəllim heyəti və tələbələr iştirak etmişdir. Çıxış edənlər Azərbaycan qadınının cəmiyyətimizdə, ailədə, elmdə və təhsildə mühüm rolundan bəhs etmiş, qadınların dövlətimizin inkişafına verdiyi töhfələri xüsusi vurğulamışlar. Bildirilmişdir ki, Azərbaycan qadını hər zaman öz zəkası, mərdliyi və vətənpərvərliyi ilə seçilmişdir. Tədbir zamanı kollecin qadın müəllim və əməkdaşları təbrik edilmiş, onlara gələcək fəaliyyətlərində uğurlar, möhkəm cansağlığı və xoşbəxtlik arzulanmışdır. Sonda kollecin qadın əməkdaşlarına və tələbələrinə bayram münasibətilə xoş arzular çatdırılmışdır. 8 Mart – Beynəlxalq Qadınlar Gününüz mübarək

Həmkarlar ittifaqı təqaüdü verildi

Gənclərin təhsildə qazandıqları uğurlar ölkəmizin gələcəyinə qoyulan ən dəyərli sərmayədir. Azərbaycan Həmkarlar İttifaqları Konfederasiyasının üzv təşkilatı olan Elm və Təhsil İşçiləri Həmkarlar İttifaqı tərəfindən təqdim olunan “Həmkarlar ittifaqı təqaüdü”nə Bakı Dövlət Rabitə və Nəqliyyat Kollecinin də 3 tələbəsi layiq görülmüşdür. Bu münasibətlə tələbələrimizi ürəkdən təbrik edir, onlara gələcək təhsil həyatlarında yeni uğurlar, yüksək nailiyyətlər və möhkəm iradə arzulayırıq. İnanırıq ki, gənclərimiz qazandıqları bilik və bacarıqlarla ölkəmizin inkişafına öz töhfələrini verəcək, cəmiyyətimizin layiqli vətəndaşları kimi daim irəliyə addımlayacaqlar. Eyni zamanda, tələbələrə göstərilən diqqət və qayğıya görə Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev cənablarına öz dərin təşəkkürümüzü bildiririk.

Ana harayı abidəsini ziyarət edildi

Bakı Dövlət Rabitə və Nəqliyyat Kollecinin kollektivi Bakının Xətai rayonunda ucaldılmış Ana harayı abidəsini ziyarət edərək Xocalı soyqırımı qurbanlarının xatirəsinə dərin ehtiramlarını ifadə ediblər. Xocalı faciəsi xalqımızın qan yaddaşıdır. Şəhidlərimizin əziz xatirəsi daim qəlbimizdə yaşayacaq. Unutmadıq, unutmayacağıq!

26 Fevral – Xocalı soyqırımı xalqımızın yaddaşında silinməz iz buraxmış faciədir.

Kollecin direktor əvəzi Səbuhi müəllimin rəhbərliyi ilə keçirilən anım tədbirində tərbiyə işləri üzrə direktor müavini Şahmurad Məmmədov Xocalı həqiqətləri haqqında öz fikirlərini tələbə və müəllim heyəti ilə bölüşərək, bu tarixi hadisənin unudulmamasının və gələcək nəsillərə doğru şəkildə çatdırılmasının vacibliyini vurğuladı. Tədbirdə Telekommunikasiya şöbəsinin tələbəsi Qurbanzadə Fatimə də çıxış edərək Xocalı soyqırımı haqqında öyrəndiklərini və bu faciənin gənclərin yaddaşında daim yaşadılmasının əhəmiyyətini ifadə etdi. Xocalını unutmadıq, unutmayacağıq.

“Vətən əmanətdir” adlı tədbir keçirilmişdir.

Bu gün Azərbaycan Texniki Universitetinin nəzdində Bakı Dövlət Rabitə və Nəqliyyat Kollecinin Həmkarlar İttifaqı Komitəsinin təşkilatçılığı ilə vətənpərvərlik mövzusunda “Vətən əmanətdir” adlı tədbir keçirilmişdir.

Tədbirin əsas məqsədi gənclər arasında vətənə sevgi, dövlətçilik ənənələrinə bağlılıq, milli-mənəvi dəyərlərə hörmət və vətəndaşlıq məsuliyyətinin daha da gücləndirilməsi olmuşdur.

Tədbirdə Elm və Təhsil İşçiləri Həmkarlar İttifaqı Respublika Komitəsinin rəhbər heyəti, Azərbaycan Texniki Universitetinin nümayəndələri, UNEC nəzdində Qida Sənayesi Kollecinin rəhbərliyi, Bakı Texniki Kollecinin nümayəndələri və BDU nəzdində İqtisadiyyat və Humanitar Kollecinin rəhbər heyəti iştirak etmişdir.

Tədbiri giriş sözü ilə kollecin tərbiyə işləri üzrə direktor müavini Şahmurad Məmmədov açaraq qonaqları salamlamış, tədbirin əhəmiyyətindən bəhs etmişdir. O, çıxışında qeyd etmişdir ki, vətənpərvərlik yalnız sözlə deyil, əməl və məsuliyyətlə ölçülür və gənc nəslin milli ruhda tərbiyəsi təhsil müəssisələrinin əsas prioritetlərindəndir.

Daha sonra söz ETİHİ Respublika Komitəsi sədrinin müavini Mirzə Cəfərzadəyə verilmişdir. Çıxış edən qonaqlar vətənə sədaqətin, dövlətə bağlılığın və həmrəyliyin bu gün hər zamankından daha vacib olduğunu vurğulamış, belə tədbirlərin gənclərin formalaşmasında mühüm rol oynadığını bildirmişlər.

Tədbirin bədii hissəsi xüsusi maraqla qarşılanmışdır. Tələbələr tərəfindən vətənpərvərlik mövzusunda şeirlər səsləndirilmiş, mahnılar ifa olunmuş, eləcə də vətənə sevgi və qəhrəmanlıq ruhunu əks etdirən kiçik səhnəcik nümayiş etdirilmişdir. İştirakçılar tərəfindən alqışlarla qarşılanan çıxışlar tədbirə xüsusi rəng qatmışdır.

Sonda qeyd olunmuşdur ki, “Vətən əmanətdir” adlı tədbir gənclərin milli şüurunun formalaşdırılması, dövlətçilik dəyərlərinə sədaqət ruhunda yetişdirilməsi istiqamətində mühüm əhəmiyyət daşıyır və bu kimi layihələr gələcəkdə də davam etdiriləcəkdir.